Flug Nr. 1000!
32 Johr nochem erschte hani's jetzt doch ou no gschafft ;-) zäme mit de 1076h total Airtime gäbi das fasch 45 Täg am Stuck flüüge.
We me so dänkt, woni agfange ha flüüge hets no kei Internet gä, kei Handy, kei Whatsapp... d Wetterprognose het me us dr Zytig gha, für nes Emagramm het me müesse e Churznummere per Telefon wähle, Zahle wo abegliiret worde sind ufschriibe u den säuber es Diagramm zeichne... ;-)
D Flugschul het no kei Funk gah, nome so es trümmligs graus viereckigs Empfängerli wo meischtens nome gruuschet het u ned wiiter aus villech 300-400m über de Landeplatz use het chönne öppis empfange.
Standard Gurtzüg vo damals wörde höt aus Liechtgurtzüg döre go, usser villech s massive Holzbrättli :-) Protektor het me nid kennt.
Mi erschti Thermikflug isch fasch 3h gange, ohni Vario, der Fluglehrer het am Landeplatz gwartet und kei Ahnig gha woni be ond i ha kei Uhr a gha, aber e a soumässigi Freud :-) Flug Nr. 11 isch das gsi am Haldigrat.
Chli Glück, oder sogar viu Glück hani natürli ou gha i dere Zyt. Bi mir isch s Selbschtvertroue am Afang ou stärker gschtige aus s Können. Das füehrt de schneller aus eim lieb isch zu bränzlige Situatione. I ha zwar no nie müesse dr Notschirm zieh, aber ou i ha mim Schutzängu scho mou müesse danke säge, nochdem i mit mim nigelnagelneue Schirm es Seili verwötscht ha... Aber i ha immer d Chance öbercho us de Fähler woni gmacht ha öppis z lehre ond das hani de ou versuecht z mache ond versuechi no höt.
Tja, Zyte hei sich gänderet, aber d Freud isch immer no gliichi wenn i mit de Vögu cha dr Himu teile :-)
Auso häbit nech Sorg ond always happy landing.
Hier sind einige Flüge die ich in den letzten 12 Jahren gemacht habe "dokumentiert".
Flug Nr. 1002!
Ganz e speziell schöne homerun :-)
😊😊😊
Was für ne final glide! De füdleblut Wahnsinn.😉
Am Schluss hani kei Meter zviu gha, ha scho gmeint es läng mr grad ned öber d Stromleitig, aber es bitzeli Nullschieber ond es het glängt, ond öber s Tierheim isch es grad nomou glich gange. Wahrschinlich d Kompensation för die viele Strafrundene woni im Amisbühl ha muesse mache 😉
Immer no öppis vom schönschte am Obe nach de Sächsi e Schluch öberem Ämmitaut usdräie bis uf 2600m ond de no hei abgleite! E liebe das Hobby😊😊😊
Comments